3Jo | MED | STEP |

3 JON KUIMP TEPA IK KɄⱠ

Ya Buk Ei Nga Puⱡ Ei:

Mon ei ropa, Geiyas nga kongun tᵾpa rᵾpᵾndrᵾm ei nga mbi paka rondpa ngurum. Wote, Diyotropis ronduⱡ ngumba mon ei, rurum ku.

Ya Buk Ei, Nam Ndi Rurum:

Ya buk ei, nombuⱡa rung wu Jon ndi rurum.

Mon Ropa Nam Ngurum:

Mon ei, Jon ndi ropa, Geiyas ngurum.

Ui Nant Ila Rurum:

Mon ei, pana 85 mba 95 AD, ei nga ruk ting ila moⱡpa, mon ei Episis kona ila rurum.

Ik Ronduⱡ: 3 Jon 1:5

Na nga mᵾn mul wu ei, nim wamp ᵾngᵾn mbᵾ kᵾn, mondᵾp pilkᵾn ronduⱡ mondkᵾn, rᵾk rᵾk ui mbila kongun etᵾn. Nim kᵾni nakᵾndrᵾn wamp mbᵾ, tᵾkᵾn rapᵾndrᵾn.

IK PENG KɄⱠRump1:1-1:8 Jon ndi mon ti ropa ruk ting ila ngurum1:9-1:15 Diyotrepis kᵾn Dimitriyas kᵾn wu raⱡ

3 John

Jon Ndi, Mon Ti Ropa Ruk Ting Ila Ngurum

1 Na Jon, Got nga rapa tenda ila rᵾp wu ei ndi, nim na nga mᵾn mul wu Gaiyus ei kᵾn, numan minal ngump mor.

2 Na nga mᵾn mul wu ang ye! Nim uⱡ etᵾn mbᵾ, omba kun pangga nᵾmp atinga rondᵾr. Na pᵾnt ei, nim nga kᵾng orunga ronduⱡ tana, nim nga min ei kai muⱡangga! 3 Unt wu ᵾngᵾn mat ok, na kundᵾk, ik kupa ei pep rorun ei, na nim kᵾn kai pᵾnt. Wote, nim uⱡ kupa ila morᵾn ei nga, na pilip kai pᵾnt. 4 Na numan mam ti etᵾm ei, na pᵾt ei, na nga kangambuⱡa mbᵾ uⱡ kupa ila mormin.

5 Na nga mᵾn mul wu ei, nim wamp ᵾngᵾn mbᵾ kᵾn, mondᵾp pilkᵾn ronduⱡ mondkᵾn, rᵾk rᵾk ui mbila kongun etᵾn. Nim kᵾni nakᵾndrᵾn wamp mbᵾ tᵾkᵾn rapᵾndrᵾn. 6 Wamp kᵾⱡ ndi, nim nga wamp numan ngui uⱡ ei, Got nga rapa tenda ila wamp kᵾⱡ kondᵾk ning. Uⱡ mbᵾ, tᵾk rap ndukᵾn itana. Kᵾni nakᵾndrᵾm wamp mbᵾ ndi, Got nga numan petᵾm ei mel, pep ruing. 7 Nambuⱡ emel, nim kᵾn, nakᵾndrᵾn wamp mbᵾ, Kraist nga kongun mbᵾ andᵾk endᵾtmᵾn. Wote, mondᵾk pili napᵾtmᵾn wamp mbᵾ ndi, tᵾk rᵾpᵾndi napᵾndᵾk mel mat, ngui nganggᵾrmᵾn. 8 Wote, tᵾn mondᵾk pili napᵾtmᵾn wamp mbᵾ ndi, wu kᵾⱡ tep rapundpᵾn kongun na, uⱡ kupa mbᵾ, mok rop tᵾpᵾn etmᵾn.

Diyotrepis Kᵾn Dimitriyas Kᵾn Wu Raⱡ

9 Na mon ti rop, Got nga rapa tenda ila wamp kᵾⱡ nga rak ndup ngur. Wote wu Diyotrepis, enim nga wu kuimbal mul kump rᵾl wu ei ndi, na nga ik mbᵾ tᵾpa roi ndurum. 10 Na int unt kᵾn, Diyotrepis uⱡ etᵾm mbᵾ, kump kᵾm oⱡa tᵾp nimp. Tᵾn nga ik kep nombun, wote nimba kit mondrum ei, elim kᵾn kapⱡa mon. Wote wu ᵾngᵾnᵾl mat ormᵾn ei kᵾn, rukᵾr ti natᵾtᵾm. Wote wamp mat ndi, rawe etᵾk ting etmin ei kᵾn, Got nga rapa tenda ila wamp mbᵾ kᵾn moⱡpa, pep ropa tᵾpa ekit ndurum.

11 Na nga mᵾn mul wu ang ye! Uⱡ kit mbᵾ, pendᵾk kelkᵾn, wote uⱡ kai mbᵾ iti! Uⱡ kai em wamp ti, Got nga wamp ei morum. Wote, uⱡ kit em wamp ti, Got kᵾni nakᵾndrᵾm. 12 Wamp minal ndi, Dimitriyus nga para nduk, wu kun kai ei nᵾtmᵾn. Wote, ik kupa ei, pilpa tᵾl nga kapⱡa etᵾm. Wu ei nga tᵾn ndi, para ndup nᵾtmᵾn ku. Tᵾn ik para ndup nilmina, kupa etᵾm ei, enim pilik mormin.

13 Na nim ik mat ou ndupa nimp mbᵾ, wote nim kᵾn mon rop, peipa ila ngump, ni nᵾnimp mon!. 14 Na ndi, nim nondpa omp moⱡᵾp kᵾnamba kᵾn, tenda ila moⱡpᵾⱡ, ik mat nim kundᵾp nimp. 15 Wote moⱡpa kundi uⱡ ei, nim kᵾn kan piyangga! Nim nga wamp mᵾn mondrᵾn mbᵾ ndi, nim pilik molk, rawe ik kai mbᵾ nᵾk ngunmin. Tᵾn nga wamp mᵾn kᵾⱡ, nim kᵾn mormin kᵾⱡ, nim ndi, enim nga mbi ila nᵾkᵾn rawe iti!